Қазақстанда республикалық «Бір ел – бір кітап» акциясы жұмысын жалғастырды. Акцияның басты мақсаты – қазақ әдебиетін насихаттау, қоғамның кітап оқуға деген қызығушылығын көтеру, Қазақстанның әдеби мұрасын зерттеуге деген қызығушылықты дамыту, өскелең ұрпақтың зияткерлік-рухани дамуына көмектесу.
2020 жылы жалпы халықтық оқу үшін екі шығарма – Мұхтар Әуезовтың «Абай жолы» роман-эпопеясы мен Әнуар Әлімжановтың «Ұстаздың оралуы» романы таңдап алынды.
Осы оқиғаға орай 2020 жылдың 26 ақпанында Әмбебап оқу залында «Даналар жолы – халық мұрасы» кітап көрмесі безендірілді.
Көрменің ортасына екі бөлім – «Мұхтар Әуезов және Абай әлемі» және «Ғалым өміріне саяхат жасаған қаламгер» орналастырылған, оларға аталған шығармалар, авторлардың өмірлері мен шығармашылығына арналған кітаптар, олар жайындағы қызықты мақалалар: «Мұхтар Әуезов туралы естеліктер», «Әлем таныған Әнуар. Признанный миром Ануар», «Мен білетін Әуезов» және т. б. қойылған.
«Әдебиет және дәуір» бөлімі оқырмандарды осы екі тамаша шығармамен, сондай-ақ қазақ әдебиетінің тарихы жайындағы кітаптармен таныстыруды жалғастырады.
Алдыңғы жылдардың акцияларына қатысқан шығармалар қойылған «Ұлы дәуір ұлағаты» бөлімі де көңіл бөлуге тұрарлық.
Көрме өз оқырмандарын жыл бойы қуантатын болады.