Л. Н. Толстой атындағы Қостанай облыстық әмбебап ғылыми кітапханасында белгілі жазушы, Қазақстан Республикасының еңбек сіңірген қайраткері Бибігүл Иманғазинаның «Бибі-Сана» кітабының тұсаукесері өтті.
Бибігүл Иманғазина – танымал «Тауқымет» романының және басқа да шығармалардың авторы. Он жеті жасында аяқ астынан мүгедек болып қалған ол шығармашылықпен және мүгедек аналарды қолдаумен айналысты. 1990 жылы мүгедек аналардың республикалық «Бибі-Ана» қайырымдылық қоғамын құрды.
«Бибі-Сана» трилогиясында жас кезінде трагедиядан аман қалған, бірақ содан кейін әйел бақытына ие болған автордың қиын тағдыры көркем тілмен баяндалған. Шығармада маңызды адамгершілік мәселелері көтеріледі, сонымен қатар ұлттық құндылықтар бекітіледі. Кітапқа «Назым» романы да енген.
Іс-шараға зиялы қауым өкілдері, белгілі жазушылар, әдебиеттанушылар, оқырмандар мен журналистер қатысты.