Қазақстан халқы ассамблеясы жылының аясында үстіміздегі жылдың ақпанында өзінің құрылғанына 25 жыл толуын атап өткен Қостанай облысындағы кәрістердің «Ен-Коди» этномәдени бірлестігінің өкілдерімен беделді кездесу болып өтті. Шараның басты мақсаты – қоғамдық келісім және ұлтаралық төзімділік. Кездесуге келген кәріс орталығын құрудың басы-қасында болған Лидия Михайловна Ким, Лидия Ивановна Ким, Галина Фиреновна Тен, Қазақстандағы ұлттарға арналған көптеген мақалалардың авторы, тарих ғылымдарының докторы, А.Байтұрсынов ат. Қостанай мемлекеттік университетінің профессоры Дмитрий Максимович Легкий, қостанайлық ақын, «Знак добра» өлеңдер кітабының авторы Федор Мин, «Ен-коди» кәріс әндерінің хоры кештің құрметті қонақтары болды. Келгендердің назарына ұсынылған кітап көрмесі, бейнероликтер, құрметті қонақтардың баяндамалары кәріс халқының мәдениетін, салты мен дәстүрін тануға көмектесіп, кәрістердің өткен өміріне үңілуге мүмкіндік берді.