Әлімжанов Әнуар Тұрлыбекұлы (1930–1993) – атақты жазушы, журналист, қоғам қайраткері.
Ең танымал шығармалары: «Көгілдір таулар», «Отырар ескерткіші», «Достар кездескенде» романы, ақын-жауынгер М.Өтемісов жайындағы «Махамбеттің жебесі», қазақ халқының жоңғарлармен соғысы жайындағы «Жаушы» романдары енген «Дала жаңғырығы» трилогиясы, орта ғасырлық ойшыл, ғалым Әл-Фараби жайындағы «Ұстаздың оралуы» романы.
Әнуар Әлімжановтың «Ұстаздың оралуы» романы орта ғасырлық ұлы ойшыл, жұлдызшы, музыка теоретигі, философ, математик, кемеңгерлігі мен терең білімділігі үшін екінші ұстаз атанған қыпшақ даласының тумасы Әбу Насыр әл-Фарабидың өмірі мен шығармашылығы туралы баяндайды.
Автор Әл-Фарабидің ой-арманының, пікірінің өз дәуірінің идеялық-рухани, діни, сондай-ақ күнделікті, тұрмыстағы талап-тілегімен, ұстанымымен үндеспегенін, қайшы болғанын көрсетеді. Басты кейіпкердің қилы оқиғаларды басынан кешкен қиын тағдырын тізе отырып, оның жан дүниесінің ең нәзік тұстарын жеткізе отырып жазушы ғалым-ағартушының әсерлі және әдемі бейнесін жасайды.