Құрметті оқырмандар! Егер сіздер кітап оқуды ұнататын болсаңыздар, бірнеше кешті өкінбей қиюға болатын қазіргі кездің үздік кітаптары жайлы білгілеріңіз келетіні анық. Абонементтер бөлімінде арнайы сіздер үшін қазақ және орыс тілдерінде «Кітап подиумы. Қазіргі кітап оқу» атты кітап көрмесі жұмыс істеп тұр.  Қазіргі кездің әдебиетіне қызығушылық танытсаңыздар, көрмеге сіздердің назарларыңызға лайықты туындылар қойылған. Бұлар негізінен сыншылардың сынынан өткен, оқырмандардың таңданысын тудырған және үлкен әдеби сыйлықтарымен атап өтілген бестселлерлер. Қазақстандық, ресейлік авторлармен қатар, шетелдік авторлар да көрмеге қойылды. Алайда заманауи әдебиеттерден хабардар болғыңыз келсе, онда Ерғали Бақаштан,  Олжас Қасымнан,Ұмтыл Зарыққаннан, Гузель Яхинадан, Дина Рубинадан, Алексей Ивановтан бастаңыз. Чарльз Мартинді, Стейси Крамерді, Давид Гроссманды да оқып шығуға болады.