2024 ж. 20 желтоқсанда «IQostanay» оқушылар сарайында облыстың мәдени өміріндегі маңызды оқиғаға айналған II облыстық «#ОқыЖәнеЖең» онлайн кітап оқу байқауының жеңімпаздарын марапаттау салтанаты өтті. Ол облыс тұрғындары арасында кітап оқитындардың қатарын кеңейтуге, кітап пен кітап оқудың беделін көтеруге бағытталды.
Байқау қазақ және орыс тілдерінде үш жас санаты бойынша өткізілді. Қазылар алқасы 88 финалисттің ішінен эссе жазу нәтижелері бойынша 36 жеңімпазды іріктеп алды.
Әр санаттағы жеңімпаздар дипломдар мен ақшалай сыйлықтарға ие болды. Сондай-ақ бірінші орын алғандар Білім басқармасының атынан балалар демалыс лагерьлері мен шипажайларға жолдамалармен, ал екінші және үшінші орын алғандар Облыстық қуыршақ театры, І. Омаров атындағы Қостанай облыстық қазақ драма театры және Қостанай облыстық орыс драма театры үшін 2025 жыл бойы жарамды болып табылатын Мәдениет басқармасының билеттерімен марапатталады.
Жиналғандарға Қостанай облысы әкімінің орынбасары Мұхаметқали Ринат Закиұлы, Қазақстан Жазушылар одағы Қостанай облыстық филиалының төрағасы Жанұзақ Аязбеков және қазылар алқасының төрағасы Суслова Александра Ильинична құттықтау сөз сөйледі. Өз сөздерінде олар өткен байқаудың маңыздылығына тоқталып, оның өткізу нысанын, қатысушылардың көп болғанын, облыстың аудандары мен халықтың түрлі топтарының қатысқанын атап өтті, осындай ауқымды іс-шараны ұйымдастыруға және өткізуге белсенді көмек көрсеткендерге алғыстарын білдірді.
Кәмелетке толмаған қатысушылардың ата-аналары, педагогтар мен білім беру саласының басшылары, облыс кітапханаларының басшылары, байқауға қатысушыларды ең көп тартқан Қостанай ауданы және Қостанай қ. әкімдерінің орынбасарлары, сондай-ақ қазылар алқасының, ұйымдастыру комитетінің мүшелері мен демеушілер алғыс хаттармен марапатталды.
Байқау кітап оқуды, кітапты және көркем әдебиет әлемін ұнататын көптеген адамдардың басын қосты. Салтанатты рәсім жеңімпаздар үшін ұмытылмас мереке болса, облыс тұрғындары үшін қолдарына кітап алып, көркем сөздің құдыретін түсінуге және кітап оқудан ләззат алуға ынталандыру болды!