Өлкетану әдебиеттері бөлімінің сирек кітаптар қоры назарларыңызға «Сөз сардарларының сыйы» көрмесін ұсынады. Көрмеге өмірі мен шығармашылығы Қостанай өңірімен тығыз байланысты қаламгерлер мен ақындардың – жерлестеріміздің қолтаңбалары мен кітапты сыйға тартқандары туралы жазулары бар басылымдар енгізілді.
Кітап тек автордың ойлары мен жазған жолдарын ғана сақтап қоймайды. Кейде оның беттерінде ерекше бір естеліктер – қолтаңба, сыйға тартылғаны туралы жазба, оқырманға немесе кітапханаға арналған жылы лебіз бен ізгі тілектер де сақталып қалады.
Мұндай әрбір кітап – баға жетпес құнды жәдігер. Кітап автордың қолынан оқырманға табысталған сәтте, ондағы айтылған ой мен сөз жүректің сыйына айналады.