2026 жылғы 16 қазанда Қостанай облысы әкімдігінің мәдениет басқармасының қолдауымен Л. Н. Толстой атындағы Қостанай облыстық әмбебап ғылыми кітапханасында «Кітапхана – ұлт руханиятының тірегі: мұра, мүмкіндік, мақсат» атты облыстық ғылыми-практикалық конференция өтті.
Іс-шараның негізгі мақсаты – Қазақстандағы кітапхана ісінің дамуына елеулі үлес қосқан көрнекті кітапханатану маманы Нәзира Қожахметқызы Дәулетованың ғылыми және мәдени мұрасын зерделеу, оның кәсіби идеяларының сабақтастығын саралау және кітапхана саласын дамытудың заманауи бағыттарын талқылау.
Конференция «Мұралар сабақтастығы: өткеннен болашаққа» атты кітап көрмесіне шолумен ашылды. Одан кейін «Дәулетов оқулары» аясында «Ұлт руханияты және кітапхана ісі: Нәзира Дәулетованың ғылыми-мәдени мұрасы» тақырыбында пленарлық отырыс өтті.
Пленарлық отырыс пен секциялық жұмыстар барысында Нәзира Дәулетованың шығармашылық жолына, кітапханалық менеджменттің өзекті мәселелеріне, зерттеушілік қызметтің даму үрдістеріне және ұрпақтар сабақтастығына арналған баяндамалар ұсынылды. Баяндамашылар кітапханалар тарихын сақтау, мәдени мұраны кеңінен насихаттау және дәстүрлі тәжірибелерді заманауи форматқа кіріктіру мәселелеріне ерекше назар аударды.
Іс-шараға кітапхана саласының мамандары мен ардагерлері, мәдениет мекемелерінің өкілдері, өлкетанушылар, зерттеушілер және жоғары оқу орындарының студенттері қатысты. Бірқатар баяндамашы онлайн форматта сөз сөйлеп, кәсіби өзара байланыстың географиялық аясын кеңейтуге мүмкіндік берді.
Конференция тарихи-мәдени мұраны сақтау мен насихаттауға, кітапхана саласындағы ұрпақтар сабақтастығын нығайтуға, ғылыми-әдістемелік тәжірибе алмасуға және қазіргі қоғамның рухани-ағартушылық өміріндегі кітапханалардың рөлін тереңірек пайымдауға бағытталған маңызды кәсіби алаңға айналды.