2023 жылдың 5 қыркүйегінде Өлкетану әдебиеттері бөлімі ұлы ғалым, ағартушы, қоғам қайраткері, әдебиеттанушы, түркітанушы, дарынды ақын және аудармашы Ахмет Байтұрсынұлының туғанына 151 жыл толуына орай «Тілдің туын желбіреткен Ахмет» атты микрофон алдындағы Байтұрсынұлы оқуларын өткізді.

Ахмет Байтұрсынұлы ескерткішінің жанында өткен іс-шара барысында ұлы жерлесіміздің мұрасын белсенді зерттеуге шақырған республикаға және қалаға танымал ақындар, жазушылар, ахметтанушылар құттықтау сөз сөйледі. Іс-шара барысында Ахмет Байтұрсынұлының тағдыры мен шығармашылығы туралы айтылды, оның шығармаларынан үзінділер оқылды. «Аққұм» әні орындалды, сондай-ақ Ахмет Байтұрсынұлының аудармасында И. А. Крыловтың «Айна мен маймыл» мысалы сахналанды. Микрофон алдындағы Байтұрсынұлы оқуларын өткізу жақсы дәстүрге айналды және оған қатысушылардың саны жыл сайын артып келеді.